Петиција за Правда за Туфи — Против нехуманото постапување на стационарот „Лана“

Ги повикуваме надлежните институции и целата јавност да реагираат на сериозните злоупотреби и нечовечки постапки кои се случуваат во стационарот за животни „Лана“ во Струмица.

Туфи беше наше сакано и здраво куче, кое го однесовме на испитувања во стационарот „Лана“, откако забележавме дека голем број кучиња во регионот на Дојран покажуваат знаци на можна заразна болест. Нашата единствена намера беше да го заштитиме, да добиеме дијагноза и, доколку е потребно, да му обезбедиме соодветен третман — било преку стационарот или самостојно дома.

Но, наместо грижа и информации, добивме молк. Наместо третман, добивме вест — Туфи е убиен, без наше знаење, без наша дозвола, и без ниту една консултација со нас. Со овој чин не беше само прекршена довербата, туку беше прекинат и еден невин живот.

Ова не е изолиран случај. Граѓани од цела држава сведочат за страшни злоупотреби и нехумано однесување во овој стационар. Еве дел од нивните коментари:

“На животните им треба спас од овој стационар… бедни сте и за жалење. Бог ќе ви суди.”
“Катастрофално претпријатие… враќање на кучиња со загноени рани… луѓе без грам емпатија.”
“Убиваат кучиња без никаква причина, враќаат болни кучиња на улица и на разни локации.”
“Не ја работат дејноста ‘залови – стерилизирај – врати’, туку работат ‘залови – убиј’.”
“Несовесни и бездушни, неспособни вработени кои веројатно мразат кучиња.”

Со оваа петиција бараме:
1. Истрага и одговорност за убиството на Туфи.
2. Мониторинг и ревизија на работењето на стационарот „Лана“.
3. Затворање на стационарот, доколку се утврди дека не постапува според закон и етички норми.
4. Доколку не се затвори, воведување строги контроли и редовен надзор над третманот на животните.
5. Казни за службени лица кои вршат злоупотреби, покажуваат немарност или нанесуваат штета на животни и нивните старатели.

Туфи не беше само куче — беше сакано суштество со право на живот, заштита и достоинство. Неговата смрт не смее да остане без одговор.

Правда за Туфи. Правда за сите животни кои не можат сами да се одбранат.